嘔心瀝血的喜帖 (上)

婚禮倒數一個月, 因為前段好快決定好大部份, 中間懶懶閒, 亦無乜心機寫blog~ 去到埋門, 好想講下嘔心瀝血既喜帖

一直碎碎唸好鍾意pocket invitation , 奈何真係好貴, 要近三十蚊一套(仲未必包副咭), 後來又見到外國有人DIY, 有人由裁紙開始, 亦有人買一個空白既pocket folder再貼內文

睇完就認為買到folder就解決到問題一半, google後發現原來美國有得賣 (連結), 0.69美仙一個, 大約$5蚊一個封, 問題係紙太重, 美國運費一定好嚇人, 繼續無奈; 心諗美國賣得隨時都係made in china, 就轉戰淘寶~~

搵左好耐, 都唔識點係淘寶搵到, 但太過死心眼, 我竟然....竟然......source到去阿里巴巴!!! 

阿里巴巴除左係淘寶母公司外, 同時亦俾生產商同買家直接聯絡既網站, 跳過trading同批發做生意, 價錢會更平, 不過訂單數量一定好大, 好似封套最少一千套或以上, 根本無預算有散客如我中入去

有考慮過係網上搵人夾單, 不過反應麻麻, 又有諗過不如訂夠一千套, 再轉售, 不過突然間有人分享左佢好靚既喜帖(連結), 身邊幾位相熟既婚禮網友突然好有興趣, 咁就決定一齊落單!

湊夠人數開始就不停同生產廠聯絡, 報價, 揀色樣, 揀好以後再到付拎sample, 

紙廠既色辦

最後大家決定參考Stella尺寸, 做5" x 7", 一齊決定好以後, 突然對方又話要加價#^#!&^$#@&^搞完一輪, 又終於答應原價賣俾我地

最後就要安排匯錢!! 如果經銀行, 手續費又好貴, 好彩有朋友借出國內匯口幫手過數

同時好擔心生產商收左錢後唔發貨(因為唔係行支付寶), 戰戰兢兢咁過左一個星期, 對方話造好, 可以送貨啦~~~~

封套+配色信封, 匯差連同所有運費, 每張只要$2!!!! 個價錢真係諗返都識笑!!! 

寫到呢段, 睇返同生產商近50個既來往電郵, 已經諗唔返當日點handle, 不過原來更煩既係後面.....

最遲的"PRE-WEDDING"

一直都無打影pre-wedding, 不過隨住籌辦婚禮, 開始有少少想影輯相, 尤其婚禮攝影用左極低價完成 ($4000有找! 詳情見: 婚禮攝影決定篇), 有閒錢就身痕......

再者, 跟長老們爭取到婚禮當日不出門不入門, 斟茶全部集中係酒樓, 當日上午非常清閒, 又怕埋門先提議不如......... 為左切斷長老們變掛既後路, 決定當日早上外拍!

婚禮攝影搵既Amazing Grace只可以話event shooting 不俗, 但snap就........所以外拍都唔會考慮 LOL 一直有留意一位freelance 攝影師(Blissfullysweet Photography), 好清新自然, 人未紅價錢又相宜, 價錢早在官網公佈(永遠係加分point!) 決定外拍後馬上聯絡

(圖片來源: Blissfullysweet FB fanpage)

相約見面睇下相辦, 傾下安排, 會面時Ivy好似朋友咁好自在, 而且絕對唔hard sell, 見面已經準備好quotation, 有交帶, 知道我要同長老再次確認外拍安排, 願意hold期2個月!!!! 

最後join左half day package, 自己當日MUA/ 交通/ 禮服全部ready, 埋單盛惠五千大元 (加埋晚宴婚影都仲係四位數!)

自己無影過其他pre-wedding, 無從比較, 不過單睇Blissfully Sweet映像未必好銳利, 但輕輕鬆鬆好係我杯茶, 唯一缺點就係唔可以拎晒全部相, package以外要加錢, 希望最後唔好大出血

買餅卡

嫁女餅嫁女餅, 嫁女就係一定要派餅 (笑)

民間智慧有雲「早買早享受 遲買平幾舊」, 但搞婚禮之上偏偏相反, 所以大家決定結婚開始, 未擇日就要開始準備買餅卡!

1. 西餅卡

開始爬網時發現美心將要改變餅卡制度, 改為現金劵, 再變成有年限, 馬上到4月的婚展搶購最後一次的「永久」通用餅卡!

上網見到有vendor送的婚展免費門票, 慳埋入場費, 八折入手, 100張另加送5張, 平均$36.6/張 <<餅卡買多D都唔怕, 放售好易有市場

2. 唐餅卡

作為後輩, 從來沒收過嫁女餅, 所以入手時毫無概念, 不過blogger這篇 (link)介紹奇華嫁女餅應如何安排非常詳細, 參考性特高, 推介!

幾家唐餅家裡, 自己偏好奇華, 一來分店較多, 二來產品也多, 親戚可以換蛋捲, 曲奇或馬仔亦得, 得左~

奇華唐餅農曆新年前後加價, 錯過了加價前元宵節的八折, 原來想在婚展一口氣解決, 但男友唔肯排隊作罷

不過奇華每次分店開幕或特別日子(例如元宵, 父/母親節等) 都會有八折優惠, 兼且婚展又沒額外優惠, 所以打算買的話可時常留意官網 (link) / Facbook專頁 (link), 遇上八折就馬上入手 (尤其八折後比教協更平)

自己就趁北角分店開幕時買了10張金喜雅~

換句話講, 餅卡八折就只有淨返特別節日, 例如: 情人節/ 元宵/ 母親節/ 父親節 (如果無改), 以及婚展 (排好長龍)~~

慶幸自己婚期未定就去買定餅卡, 慳返一百幾十  同埋功課時留意到, 奇華每年都係大約農曆年前後就會加價, 所以各位未買餅卡既wow友, 真係見有折就好買定, 因為真係 「早買平幾舊」!


*** 怕yahoo摺, 轉載部份資料***

1.折扣優惠：

奇華員工價和婚展卡也是一律8折的，有時慶祝新舖開張亦會有8折優惠。

2.龍鳳對餅
而大家謹記購買奇華餅卡時，一要多買兩張金雅喜（銀）$75那款，因為過大禮時，需要兩對龍鳳對餅，而奇華是沒有龍鳳對餅餅卡的，所以用金雅喜換購啊！

3.keep收據，換禮金盒
另外就是保留正本收據，在過大禮時，便可以到任何奇華餅店，免費換購禮金盒一個啊！

4.換套裝 / 換散裝餅
其次是購買餅卡並非買package，還等於現金券使用。例如我買了價值$298的金御喜套餐，換餅時除了可以選擇換1套金御喜，也可以選擇用以換購2套金緣喜 + 1套金盈喜。
值得注意的是，如果大家想借用奇華傳統的過禮盒，要一點向門市登記啊!
如果過大禮時，不是過餅卡，而是過實物（即一擔擔餅過），我建議在換餅前要提出不要禮合套裝（即那些紙盒及鐵盒），由於這些紙盒及鐵盒全計算價值的，所以不要盒的話，用餅卡價值換餅能換取更多個餅啊!!!

傳說的run for the dream

傳說中, 銅鑼灣有間隱世婚紗店....
傳說中, 店內有各式designer brand婚紗
傳說中, 店主Connie非常好人....

從做功課開始就鐵心必訪Connie, 所以預約要等一個月都唔怕, 終於等到9月可以去試啦~

睇過分享都預左鋪仔細細去到發現間鋪只自係個倉, 拉起少少布做更身位置, 最好事前先去blog到睇定想試乜款, 等Connie先揀定出黎, 慳返時間搵

心水款式


Monique Lhuillier ELLE


Melissa Sweet - FERN

WVW Fern

一拎上手, d衫真係好靚好靚好靚好靚好靚  果然一分錢一分貨

可惜, 試完就發現自己著低腰顯得對腳仲短, 唯有開始轉變要求, 試下connie提議既款式

試衫期間, 同Connie傾計, 好人有禮友善就一如網上所語, 但提到佢本身只係業餘營運, 租間細鋪可以無租金壓力, 催客人開單, 聽得出真係好鍾意d衫, 雖然同Wendy唔同, 講唔上非常瞭解做衫, 但果種替人開心, 試衫過程自己同朋友都好開心自在

只可惜自己生得矮, 唔爭氣, carry唔到歐洲款

Lace靚到不得了, 但成熟左少少

呢款好平凡

唉.....朋友睇完model著呢款San Patrick Ramaje係咁鬧我破壞左件衫

個紗又輕又軟, 拎係手感動到想喊, 可惜又係低腰

呢款其實係Mermaid, 太矮好似著到佢變A line

最後Connie諗到Pronovias件Pergola估計會適合我, 麻煩改衫師傅專登拎俾我試, 一試真係

朋友都大讚呢件一流, 聽埋價錢, $3000租到Pronovias, 真係抵到喊, 仲可以firm左再轉款
Connie提我唔駛咁急決定, 可以隨時email俾佢就可以~

停低落黎, 記返Wendy件「蛋糕裙」都係非常好睇, 個人十五十六, 非常爭扎, 但朋友認為march in必要配拖尾, 投票下Pergola全票當選, 而自己亦怕記憶美化左「蛋糕裙」, 決定再試多次Wendy就決定邊件做the one!

Next Round: Connie PK Wendy!

試衫第一回

上篇附有超長篇婚紗店list, 自己首選兩間小店: Run for the dream同Wendy's Bridal, 打電話約時間試身, Wendy約到兩週後, 而Run for the dream就要約到1個月後

既然約到Wendy, 就打算先試尖咀再去中環, 否則倒轉次序睇完靚野再無心機~

時間推回返一個月前, 一口氣約左3間尖沙咀既婚紗店: Ballroom, Fairlady同壓軸既Wendy (可惜全部無相)

1. Ballroom- 第一間去試既婚紗, 去到先睇ipad, mark低後如果有期職員就會馬上拎衫出黎睇真身, 拍上身睇睇, 再決定free trial 邊2件
衫款全部基本無出錯去飲款, 無乜失望或驚喜, 但服務真係好好, 收費清晰, 唔會要拖尾加錢或分grade, 又唔hard sell, 感覺好好, 如果怕耳仔軟既去呢間唔駛怕一頸血

2. Fairlday Lady: 諾士佛台樓上鋪, 睇facebook見有幾件仿White by Vera Wang都唔錯, 見約Wendy前有時間就攝去睇
基本睇tablet 時就好O咀, model相連nu bra, 扣針同衫夾都無執走, 睇到曬
其次又一定要check埋like左FB先有free trial, 連拍上身睇婚紗都無, 係見時間尚早先去試下, 估唔到試到第二件時個姐姐唔肯離開「更衣室」, 只肯「擰轉面」, 真係好無奈.....
試左幾件好dreamy既紗款, 可惜cutting唔太好, d紗紗網網係腰身位置堆埋一齊, 原來個人已經圓碌碌, 著到更肥....
好彩唔hard sell, 試完快快走人.....

3. Wendy Bridal Salon: wow呢邊唔多人提, 但yahoo blog果邊Wendy係一間好評如潮既婚紗店, 據講Wendy係一個好多理論既事頭婆, 去到終於見識到~
準時去到, 但因為Wendy太長氣, 同上一pair講多成10分鐘先完場到我, 先上一堂「準新娘應如何揀婚紗」講座, 再睇下Wendy分享舊客既婚紗相, 之後先入戲肉, 開始睇婚紗

無ipad, 無相簿, 所有款式除左掛起display外, 就全部係Wendy腦入面, free trial三件: 一件自己鍾意款式, 一件Wendy認為你適合款式, 以及一件即興揀既......
首先Wendy提出要我試一件「蛋糕裙」, omg! 最怕最怕最怕裙撐款, 馬上婉拒, 然後試左一件仿White by Vera Wang既, 雖然事前Wendy已經話唔夾自己, 試出黎, 果然.....
之後就係Wendy大力推介下試曾經提過似Fuuny Face既短身婚紗, 估唔到好鍾意! 又適合自己著婚紗斟茶既要求!
然後試左一件full lace既A line, 不過不失, 以為試衫環節已經完畢, Wendy再提議試「蛋糕裙」, 諗落試下無壞就做下聽話客
拎出黎, 估唔到「蛋糕裙」唔係美女與野獸Belle果種, 而係偏向vintage既layred sheath gown, 實穿效果好讚! 明明又肥又短, 竟然carry得到之餘個人仲顯得瘦長左!  陪去試衫既姐妹們都一致大讚!

心目中既「蛋糕裙」

令我喜出望外既「蛋糕裙」（網上search到既相似款)

不過自己唔太鍾意vintage feel, 有少少猶豫, Wendy亦無hard sell, 仲叫我有時間慢慢睇, 咁就完成運吉一日遊~~
Wendy鋪頭細細, 而且d衫都放得幾亂, 甚至少少情緒化(明明其他人準影相, 到我問果陣又唔俾), 不過經驗好豐富, 自己亦會做衫, 成次試衫收穫好多, 尤其佢講既穿衣之道真係太適合唔知乜野適合自己既b2b
以衫既質素(主打lace/ A-line & vintage), 2千幾蚊一件既價錢的確非常唔錯~

挑選婚紗準備篇

自己希望婚禮簡簡單單, 唔想由朝換衫換到晚, 希望一婚紗一晚裝了事, 加上有WOW友幫忙買到White by Vera Wang既姐妹裙當晚裝, 所以target主要focus係婚紗

又share一下不停email問返黎既婚紗鋪rate card, 主要分3種:

1. 中環鋪: 靚, 歐洲款, 店內再有White by Vera Wang或其他designer brand坐陣
例子: Peony Bridal, Iconic Bridal, Foi Wedding, Lovis Sweet, Miss Bride Wedding
平均單租婚紗大約5k, package麵價7-8k, 相信加upgarde等等10k埋單

2. 尖沙咀鋪: range比較大, 公主feel, 仿WVW款, 台式, 閃閃閃, 各種style應有盡有
基本去飲必會見到既飲衫集中地, 偶有佳作, package價錢合理, 不過如果單租一件婚紗計, 同中環價格分別唔大

3. One Man Band店: 鋪頭細細, 靠店主一人撐起一間鋪, 雖然無排場或公式服務或靚鋪, 但口碑載道, 人試人讚
例子: Run for the dream@銅鑼灣, Wendy Bridal@尖沙咀 (仲有一間ClassicTina@黃埔, 不過自己無問價)

下一篇分享下到試衫心得~~

婚姻不是玩泥沙 — 台灣批踢踢「我堅持不跟男方家人住..他要退婚」一文有感

睇完朋友fw左一篇台灣forum「我堅持不跟男方家人住..他要退婚」既post, 感受好深, 好想分享一下

內文大意係台灣一位B2B既未婚夫既係單親家庭, 又係獨子, 婚前男方媽媽遇上車禍, 變得行動不便, 男友希望改變搬走計畫, 婚後希望同媽媽同住好方便照顧.....但二人商量不果, 最後未婚夫認為「觀念落差太大」, 決定不結婚

其中有人打左大長篇去回應, 寫得情理俱備, 睇完有如醍醐灌頂, 精選如下, 全文在此

天有不測風雲，人有旦夕禍福，就算現在妳男友的媽媽沒事，十幾二十幾年後要
是遇到類似的事情，當老公說要搬回去照顧媽媽的時候，妳又該怎麼辦？

一堆人一直扯照顧幾十年壓力很大云云，很簡單啊，要是還沒結婚，那就直說自
己擔不下這個責任，即使不需要妳照顧，心理壓力還是太大，如果已經結婚了呢？
跟夫家說不好意思我不接受孝道外包，是這樣子嗎？

婚姻不就是一起面對各種事情，一起互相扶持，雙方的家庭有事，我們能幫就就
儘量幫，假使是長輩長期癱瘓的例子，家族成員聚起來開會討論怎麼照顧、輪流
照顧、請外傭、外傭申請不到請台傭、看護費怎麼分攤，正常應該是這樣子吧？
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
套句大家最愛講的話
『如果結婚沒有過得比現在好，那我又何必要嫁？』
同理
『如果結婚只會過得比現在還要痛苦，那我又何必要娶妳？』
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
我不知道婚姻對妳來說是什麼，我前陣子才跟老婆無聊提到這個問題，講到最後
，婚姻就是現實交織於男女兩人身上，還附帶兩個家庭，有苦一起吞，有好處一
起享，整天吵吵鬧鬧，但是雙方只要誰一出問題，第一個就會想到找彼此幫忙。

我也跟老婆說，我只希望婚姻最後的畫面是：

吵吵鬧鬧幾十年，當哪天我躺在病床上要嚥氣時，還是緊握著老婆的手，努力撐
開眼睛，把眼前這個跟著你幾十年的身影牢牢記住，因為眼睛一閉上，這些年的
風風雨雨跟酸甜苦辣，就會變成回憶，再也看不到了。
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
婚姻是一輩子的事，妳不需要勉強自己，別人也不需要什麼事情都遷就妳。

籌辦婚禮係非常開心既事, 不停挑選華衣麗服, 又收到各樣祝福, 就算再煩都係甜蜜的負擔, 某程度忘記左婚姻背後既意義: 組織家庭 (whatever生唔生小朋友)

順景時當然相安無事, 逆景都不離不棄先至算得上係家人

自己係不孝女, 死女包, 就算搞婚禮期間都不停逆長老們意思, 但希望面對真正問題時, 以後可以同身邊果個共同面對, 互相支持, 不離不棄, 大家共勉之

新郎禮服inspirited by red carpet

試妝時同化妝師提過, 自己希望造型大約跟荷里活紅地毯差唔多就好了, 千祈唔要浮誇登台feel; 既然如此, 男禮都應該跟我風格, 大約smart causal 至black tie之間......

雖然幾十歲人仲去迷星好白痴, 近年自己真係好鍾意英國男星Tom Hiddleston, 一齊參考下佢係紅地毯既穿著

倫敦war horse 首映, 有威廉王子出席, 所以會係正式black tie著法: bow tie+黑色絹面圓領款禮服, 褲頭唔知係同係絹面定腰封呢?

另一款black tie造型, 今年康城影展晚會, 尖領禮服, 個人口味鍾意上一件圓領款, 好似hip d

BAFTA, 英國學術電影獎, 香港最鍾意叫做英國奧斯卡, War Horse同款禮服配普通tie, 感覺即時dress down左, 無咁隆重

雷神LA首映, 全黑劍領(又好似十字領)西裝配黑Tie, 如果最後真係揀sheath gown, 同黑色裝都襯得到, 否則好似casual左少少

Bank Sky Award, 自己覺好老土既三件頭款西裝, out~

Avengers 倫敦首映, 西裝款配bow tie, 條反光邊hightlight左成件衫~

似乎禮服款配tie或者西裝款配bow tie, 隆重與causal之間最岩我心水

所有圖片出自Torrilla tumblr

上網買結婚戒指 (1)

自己一直希望求婚戒指同結婚戒指並帶, 所以睇既婚戒都以可以配合e-ring為主, 有細石既, 有波浪紋既, 或太粗身既都唔適合; 曾經考慮過環石款, 但試過睇中隻要近三萬, 實在太貴........ 原來想要周生生代理日本既il regalo, 可以刻有斑馬紋, 好型~

叫埋男友confirm係咪一樣鍾意, 點知佢堅持自己需要成日到地盤走動, 只要最最最最最plain既戒指, 連刻紋都唔要, 仲隨手試埋金鋪現成款, 話自己只要呢隻, 其他免問........ 但成隻江湖大佬款咁, 我唔要做江湖大嫂啊....

江湖大佬款

男友不停強調我自己可以買過第二款, 毋需一樣, 但結婚戒指總唔可能完全唔同樣掛

唯有自己都要一隻光身戒指, 不過主流金鋪既白金戒全部都好有江湖味, 完全無2-3mm闊既選擇; 問過周生生訂造, 報價9千3!!!!!! 卡地亞都唔駛咁貴, 即係唔想造啦
樓上鋪黎講, 試過一間, 拎上手輕飄飄, 同金行試過既非常唔同, 未來師奶仔怕俾人呃

估唔到一隻咁簡單既戒指都咁難搵, 自己又唔想我就卡地亞, 男友就周生生, 好似太刻薄 (而且亦唔捨得)

心灰意冷下搵到一間美國網上珠寶公司 - Blue Nile, 竟然有賣, 價錢仲好合理!

做功課研究下, Blue Nile係美國Nasdaq上市, 主要賣鑽石, 甚至可以先揀卡裝鑽石再選擇鑲嵌方式, 設計自己鍾意既戒指, 網頁內有printable ring size chart俾人決定大細, 買完一年內免費resize, 仲要30日免費退貨 (香港要俾運費), 我就膽粗粗落單啦~

美國而家放Labour Day, 要9月3日先寄出戒指, 收貨後再分享~

8月進度表

大日子: 2014年5月

婚宴安排

場地: 北京道一號東海薈

席數: 預定15席

賓客名單: 女家已定, 等男家資料

座位表: 女家已定, 等男家資料

結婚蛋糕: 未決定, 伴娘&統籌送

酒水:任飲plan

紅酒: 男友家姐贊助全場

烈酒: 已準備MaCallan2枝, 預計年底旅遊再買; 不過男友家人均為飲得之人, 多買好貴, 考慮轉其他牌子

席前飲品: 酒樓提供

席前小食: 酒樓提供, 預算另外多買一點

囍帖: 酒樓提供, 不包印刷, 要求男友手寫補資料

簽名布: 未買, 打算用IKEA相架代替

簽名筆: 未準備, 預算淘寶

酒樓佈置: 用酒樓原有裝飾及氦氣球 (未買)

傳統用品

金器: 已吩咐父母不用買

龍鳳被: 希望不駛買, 以後唔會用紅色床單

所有上頭用品: 不適用

男女家對聯: 未知, 暫時父母表示不貼

喜字裝飾品: 淘寶已買

紅傘: 不用出門

囍字跪墊: 酒樓未知有否提供

敬茶茶具: 酒樓提供

利是: 只準備好利是封

西餅咭:已買美心舊款105張

唐餅咭: 已買奇華金雅喜10張

回門乳豬: 酒樓送

禮服

新娘婚紗:已有心水, 等9月中再到Run For The Dream試

新娘晚裝: 已買White by Vera Wang

新娘裙褂: 不用

新郎禮服: 未定, 預算訂造

媽咪/ 奶奶衫: 未買套裝

伴娘/ 姊妹裙: 各人自行採購

兄弟呔: 未買, 已有idea

新娘鞋: 已買

新郎鞋: 未決定買或唔買

交通安排

婚禮地點方便, 只安排朋友運送物資, 其餘人等自行到酒樓集合

花飾

花球: 鮮花, 決定婚紗後再考慮款式

新娘頭花: 跟花球

伴娘 /姊妹手花: 打算不用

新郎/ 伴郎 /兄弟襟花: 未決定

主婚人襟花: 未決定

證婚

地點: 酒樓

時間: 8:30pm

證婚律師: 何廣榮律師

結婚證書封套: 律師唔包, 苦惱中

介指枕: 律師唔包, 苦惱中

當日攝錄

婚禮攝錄: Amazing Grace 阿峰

成長片段: Amazing Grace, 考慮要唔要

早拍晚播: 不適用

妝扮

新娘化妝: Sharon Leung makeup

結婚戒指: 已決定, 未買

姊妹化妝: 由姊妹自行負責

媽媽/ 奶奶化妝: 打算由姊妹I 幫忙, 未確認

音樂

婚宴音樂: 已決定大半

進場音樂: Salut d'amour

開席音樂: All you need is LOVE  (猶豫中)

敬酒音樂: 已決定大半

送客音樂: 已定大半

其他

Rundown: 有概念, 需要補回詳細資料

兄弟姐妹分工表: 姊妹部份已定, 未有兄弟團資料

物資清單: 未draft

座位表: 考慮是否製作

台號: 應該DIY

Welcome Board: 已經畫好稿, 等print foam board (果然係心急人! )

「請尊重自己﹑他人 & 知識產權, 切勿盜圖 & 設計 」

婚禮服務行業實在良莠不齊, 時常見到部份VENDOR特別註明尊重知識產權「警告」字句, 但行業間到底又係點一回事?

某間提供PHOTO BOOTH即影即有服務VENDOR FB PAGE 「新Props製作中，Do you like it ?」

只要稍稍用力爬網的B2B, 都會發現道具出自外國網站 Oh! happy day

完全沒提及來源, 而且商業引用會另有條款都是常有認知吧.......

WTF! 這張更嚴重, 相信大家一眼都看出這是完全抄襲, 甚至連FB PAGE 註冊名字都抄襲自另一著名攝影師

更荒謬是, 這種盜取他人設計的仍然收取「市價」, 繼以前提到(link1, link2) 瘋狂標價以外, 另一種令人生厭的行業生態

尋找MUA 2 & confirm

上回提到, 先試左Candy Tong, 雖然整體好好, 不過又好似達唔到自己希望既妝效, 所以決定試多一個; 當初部做research時, shortlist左3個, 其中2位MUA都係Zing makeup school畢業, 估計風格都會比較接近, 所以決定試妝頭都合心水既Sharon Leung~

試妝係尖沙咀一間樓上商場「一格」舖位 (真係好細, 連Sharon都建議陪黎試妝既朋友都要遲一個鐘先到), 入到去未坐低, Sharon就一口氣講儘醜話: 試妝只係試, 反映唔到big day真實情況 blah blah blah~~~~ 果下呆左, 雖然知到網上評語佢好有性格, 以為自己唔駛公主式照顧, 無有怕, 有左心理準備都仍然有d意外

然後就分析開始我既面形, 呢part唔係單純既批評, 講得好中肯, 講到優點同缺點, 又會講適合邊種妝容, 髮型又應該要點~ Exactly就係自己口味   審美觀80%配合! 原來扣走既分數全部追返曬!!

口水多過浪花咁講左好一陣後, 準備上妝, 一打開化妝包, 分數又馬上飆升: 化妝包乾淨整潔! 始終MUA一個月幫咁多人化妝, 衛生情況絕對反映在細節之上~
好多MUA都強調自己用一流既product, 但令我超級意外既係Sharon既化妝掃係 白! 鳳! 堂!
大家未必認識, 但白鳳堂係日本一級既化妝掃生產工作坊, even Tom Ford要推出化妝品, 化妝掃都要係由白鳳堂製造!!!! 一枝細細既眼影掃都要4-5百一枝, 真係好捨得

基本貼完假眼睫毛/ 雙眼皮貼果下, 已經想大叫: Sharon我要confirm你做我婚禮MUA!!! 完全化到自己最愛化妝師Kevyn Aucoin同Lisa Eldridge既風格: makeup is not transformation, is to create a more beautiful version of yourself! 化完妝只係隱惡揚善, 而唔會唔認得自己!

然後底妝, 然後髮型, 只可以講完完全全係心目中需要既化妝style, 中間不停同Sharon講我會confirm, 佢都叫我睇多陣, 睇多陣先, 絕不hard sell

自己明知一盤髮就好肉酸, 原來Sharon都認為可以一試, 個chignon梳左一半就明白我真係唔夾, 馬上轉style, 整左個好似Gwen Stefani既all back款, 連朋友都大讚係2次試妝最靚既髮型~ 自己確定可以完全放心

當然, 人無十全, Sharon亦有佢既缺點:
底妝做唔到flawless, 雖然係混2色粉底, 最擔心既配色無出錯, 不過finishing唔夠靚
眼線一樣, 好似唔夠smooth, 細節位未必完美 (謎之聲: 婚禮始終無人留意到眼線smooth 唔smooth, total look緊要d)
其次夠細心, 處理假眼睫毛唔小心督到一下, 好痛
重要既係好似一開始講, Sharon真係好有性格, 講野直接, 不停提我要減肥 (呢part我真係無得say no!), 有彈有讚, 係咁讚我靚女 (係咪講野好直先 ), 自己覺b2b情緒都比較敏感, 好易介意人地既說話, 所以大家要諗下怕唔怕

如果唔係玻璃心, 又希望得到荷里活紅地毯style妝既 b2b絕對推介搵Sharon Leung

尋找MUA 1

每個新娘子都有一個item特別緊張, 有人係攝影, 有人係婚紗, 而我就絕對係化妝!

係blog同FB screen左好多個MUA, 發覺睇相真係唔容易睇得出化妝技巧, 因為打燈, 美肌相機等等都會影響效果, 基本share出黎既都基本唔會有大問題, 反而最值得留意既係髮型~ 好多MUA只要睇半年左右 out job相, 就會發現只有A/ B/ C髮型, 最多換下頭飾了事

以下幾個都係自己睇中髮型唔錯, 網上評語亦好既MUA, 事先聲明, 化妝係非常個人選擇, 而且試妝費唔平,  雖然無相, 希望大家可以當試妝前一個ref

1. Candy Tong
平常都唔會睇vendor 寫既wow, 係有次竟然見到Candy set既頭好OK, 再細睇佢blog (link)既相都非常合意, 咁就send email報價, 早+全晚化妝都係5千有找, 簡直驚喜價, 二話不說就book試妝, 當中溝通都非常順利

試妝當日, 首先由修眉保濕開始做, Candy, 我同朋友3個有講有笑, 全程都非常輕鬆自在, 無所不談

先講優點
底妝方面Candy化得好靚, 自己下巴位有唔少暗粒及痘印, 上完底妝變左flawless skin, 讚!
眼妝細節掌握好好, blend開眼影同眼線都做得好精緻, 加埋假眼睫毛同雙眼皮貼可以放到對眼好大
髮飾好多選擇, lace, 閃石, 絲花全部都好齊全

不過最後都無confirm到Candy, 因為始終做唔到我心目中既「清」, 雖然眼影眼線都已經好輕手, 不過假眼睫毛仍然好厚, 自己原來已經係大眼一種, 貼埋雙眼皮貼就太over啦~ 加上髮型又好似唔太適合自己, 無一定我遇到MUA啦既感覺
反而臨走卸半妝, 拆散個髮型後竟然自己鍾意到不得了, 但朋友同Candy都認為完全唔係宴會妝........
既然已經約左另一個試妝, 當時決定如果下一個試妝都唔ok就搵Candy~~

最後當然由另一個MUA跑出, 遲下再寫~~

婚禮攝影決定篇

續上篇, email溝通一輪, 就到左面談時間~

1.  CS Photography
第一間拜訪首回合最心水攝影公司, Studio係葵興, 地點唔容易搵, 最好預最少15-20分鐘搵路
上到去, 開始睇相, Fai都會簡單介紹下作品及當日流程, 同事前功課及預期都無太大出入, 就連男友都讚其中部份相捕捉到非常獨特既時刻
見面後評語: 公司靈魂人物(估計係老細) Fai有禮, 全無hardsell, 但似乎唔係口甜舌滑之人, 如果有b2b希望攝影師可以完全取代大妗姐, 就未必ok啦~
全team人擅長snap, 如果1p1v影standard的話根本好浪費, 但最多snap就會集中係早上接新娘或外拍, 我地只擺晚宴, 似乎唔太切合需要

當決定只要1P, 而所有freelance或小型studio既大半價值都在於snap, 所以要求降至: 合格攝影, 當日唔黑面, 最後有相交貨

下一站去金都睇純美新娘, 途中係商場見到網上有好評既都會入去問問, 最後問左3間:

2. Amazing Grace
blog界對Grace既評語基本無乜負評 (forum有), 但Grace已經無期, 睇左2個攝影師作品, 都係正常合格相, 無特別印象
網站無公開價單, 店面leftlet先有, 俾大家一個ref:
1P1V: 半日3888, 全日6988, 包基本執相, 成長片段, 相簿(只限全日)
2P1V: 9888, 細節同上
即日剪片要加錢(好似2500, 或用相簿換), 當日派相: $3000/ 150張 (包相套, extra$6/張)
不包外拍, 接完新娘後就要5:30先再到婚宴會合, 否則要加OT $200/人, 如果全日2P計埋外拍價錢一定過萬, 全日細節同其他studio有d唔同, 有少少tricky
因為太過擔心死卡無相, 膽粗粗問可唔可以當晚先自行抄走一份copy, sale嘉慶回覆 「ok, 唔建議」, 強調Amazing Grace係收相先俾尾數, 所以佢地擔心死卡多過我

3. 純美新娘
事前已經睇過大量好評, 最初既2nd choice, 如常睇下相辦, 點知.........所謂effect相好嚇人!!!! 仲係小學維園沙龍風格, 茶色濾鏡, 極老土pose
太過震撼, 個腦一片空白, 突然回到千禧前, 好似中左千年蟲咁hang左機 , 所以對之後問既細節, 以及再之前問既Amazing Grace印象極為模糊......

4. 幸福宣言
迷迷糊糊間走入去問既, 依稀記得有wow友join過呢間, 咁又去睇下
攝影風格會似小型studio多過金都, snap幾好, tune色tune得唔錯, 價錢都係坊間價 (2p1v萬二)
不過男友話好多相都crop左腳, out!

so far 幾間金都攝影sales都唔hard sell, 但明顯同之前CS photography果種小型studio好唔同, 全部都好sale格, 好叻去present自己公司, 問一句就答足曬全部, 尤其對婚禮流程熟悉, 所以大家有時間, 不妨去運下吉, 聽下問下, 再去小型studio時就會識問細節

最後, 因為「收相先交尾數」呢個賣點, 男友決定搵Amazing Grace (所有婚禮itme佢都無say, 唯獨係攝影交佢負責, 雖然我真係鍾意CS多好多)
無左Grace, 又用邊個好呢? 問左wow友jojoka用過既阿榮話都好好, 咁岩又有期, 原來諗住用佢, 男友再細睇多次後, 決定用另一位阿峰, 話所有相都無crop名牌云云
雖然有負評 (link), 不過當中問題對我影響唔大, 又繼續由男友話事
就係咁, 超級 "within-budget"下 join左Amazing Grace, 希望最後唔會撻Q啦~

婚禮攝影準備篇

婚禮攝影算係最煩一項, 價格可以由幾千到幾萬, 1p1v, 2p2v各種組合, 更時有聽聞死卡, 無曬相, 水平不對等等各式問題, 而且係賓客關注度最高既服務之一(緊次飲宴), 自己budget以10k-15k為限, shortlist左一堆vendor

唔認為價錢係乜秘密, 所以全部照報價直寫, 以下截至報價以2013年7月中

講少少對各vendor接洽間既評語 (純粹個人觀感, 不喜勿插)

1. Joy's foto:
tune相好靚, 顏色燈光都配合得好好, 雖然FB貼既snap角度有少少怪, 但wow友分享既又好得喎
更驚喜既係2p1v價錢都唔過萬, 一流
可惜自己婚禮當日無期

2. 純美新娘
平靚正之選, wow友blog界有大量好評 (除左攝影師Alex, 附上負評blog: http://blog.yahoo.com/yuen_bigday2012228/articles/1094104)
價錢真係好平好平, 口碑多數讚做埋大妗果份, standard無甩拖, 不過無人讚過snap
會到金都睇睇

3. CS photography
個人首選, 由blog分享到FB page相既style都非常鍾意, 網上口碑唔多, 但一致好評
其他人或者覺得會接其他function攝影唔夠專, 但自己認為婚禮攝影無回頭客, 但商攝影做衰左以後個朵就臭, 實無job, CS photography其他商業客對自己會係加分位
最緊要係明碼實價放上網頁, 唔駛花精神send email問, 非常好!
而且中途自己問過好多唔同問題, 尤其問到半日攝錄, 幾間攝影都馬上失蹤唔答, 或者"突然"無期 (上午問全日都ok, 下午問半日就無期), Fai都答得好快, 未見真人已經好鍾意

4. Ocean Wedding & 9. Flawless Wedding
網上有好評, 加上自己對公開價錢既vendor都會自動加分

5. Pink Cloud Production
得到自己喜歡既wow友Netfish加持, 加分
明碼實價公開價錢(包括半日package), 加加分
睇左成年既出job相, 明顯睇得出團隊進步, 不過覆email有d慢 (等左5日), email第一句就話價已加.......

7. Dream Wedding Day
都唔記得點解會問, 估計貪平.......

8. Jan Wong Photo & 10. Alan Mak @ Pure
純粹見好評問下, 2p1v絕對out budget

其餘入左表又無詳細介紹既, 不礙乎send email都唔覆價, 要答好邊日擺, 擺邊到先斯斯然覆, 或者一問到半日package就失蹤, 下一篇寫下最後揀左邊間~~

按捺不住, 終於公佈!

理論上要到9月, 男友正式簽約後才打算公佈婚訊及開始安排, 不過自己一直希望5月結婚, 一來我們5月開始, 二來....6月是去歐洲的最好時侯!!!!!!!! (日照漸長, 天氣宜人, 但又未開始暑假的酷熱及旺季收費) 好擔心太遲準備訂不到酒席, 一直等啊等啊, 聽到男友下一份工作有眉目後, 就連最後耐性都消磨, 馬上跟父母宣佈!

最初擔心媽媽會要求好多, 竟然意外地(暫時)要求簡單, 接受四不做: 不過大禮, 不上頭, 不出門, 不入門, 甚至禮金低至一個名牌銀包的價錢, 可算超超超值價!!!

月份由我們決定好, 而日子由媽媽按通勝決定~ 確定好一切, 就要馬上進入直路: 訂酒席! 雖然不足一年, 心儀酒樓竟然仲有位

最後就到男友同家人宣佈啦~ 因為是在家庭大形聚會時提出, 最初以為會難為情, 沒想到男友家姐馬上決定贊助紅酒, 男友阿姨們話馬上點清保險箱給我揀金器, 還有他外甥們跑過來抱實我, 說希望快點叫我舅母, 其他親人都為我高興, 感到很真摰的祝福, 真的有點感動

現在開始, 籌辦婚禮進入大直路, 正式接洽和找尋攝影, MUA, 婚妙等等!

當一個正能量準新娘

blog來blog去, 見到好多b2b都為小事抓狂, 媽媽的要求 , 未來奶奶的習慣, 朋友姐妹們唔通氣, 常常雙眼噴火打blog

自己婚事仍未開始籌辦, 隔岸觀火中, 心諗辦既係喜事, 當然希望自己滿意, 家長高興, 賓客歡喜, 不過無可避免有不順心, 以下是自己想法:

父母要求? 這個自己最擔心, 希望撒一下父母嬌可以解決

新抱大戰未來奶奶? 默唸合二姓之好一百遍, 只要不同住萬事有商量

姐妹諸多要求? 既然是好友都知朋友個性, 儘量找平易近人的, 為了避開一個公主病, 決定放棄一group好友, 只要2個「順德人」, 還有要記著對方是義務為自己勞碌奔波, 心情靚曬~

賓客唔賞面? 好行夾唔送, 犯不著為閒人粗心

男友對婚禮最大要求是: 唔好孤寒朋友! 根據多次兄弟心得, 看過好多「阿嫂」為慳錢, 只好叫兄弟姐妹團辛苦, 雖然為朋友, 但勞碌過後, 怨言真的少不了, 尤其婚禮開支最重部份一定不是兄弟姐妹, 情願自己禮服, 花球, 婚鞋等等慳, 都不能待慢朋友

自問是個control freak, 遇上問題肯定大發雷震, 希望先行自我勸勉一番, 千萬要當個正能量新娘! 共勉之!!


他強由他強 清風拂山崗
他橫任他橫 明月照大江
他自狠來他自惡 我自一口真氣足  - 〈九陽神功〉


冰心訣:

心若冰清，天塌不驚
塵垢不沾，俗緣不染
虛空寧宓，混然無物
心無罣礙，意無所執
解心釋神，莫然無魂  - 聶風


夠啦! 癲夠未!!!!

簡簡單單

外國有很多伴娘衫, 或婚禮賓客的晚裝沒有太誇張, 簡簡單單當作敬酒晚裝也好看

兩款也是Monique Lhuillier Bridesmaids系列

Dalia MacPhee Strapless Chiffon Trumpet Gown

Donna Morgan Ruffled Peplum Chiffon Gown

Veni Infantino Pleated One Shoulder Ruffle GownJulietta Veni Infantino Pleated One Shoulder Ruffle Gown

而且售價只是港幣二千左右, 比租借更實惠~ (以上都從nordstrom找到)

而我.....就買了White By Vera Wang伴娘系列的V Neck Sleeveless Chiffon Column Dress, Valentina色, 看照片的大紅色, 應該好適合敬酒用

主要是同樣準備結婚的網友到美國旅遊, 順路到David's Bridal裡看White By Vera Wang, 主動提議由美國人肉替我帶White By Vera Wang回來 (好感動(blushing)), 但自己未想好穿什麼款式的婚紗, 所以就斗膽買了這款~

VW360027-Valentina 官方照

 台灣姑娘放售時的實穿照 (link)

Jill Stuart婚紗

Jill Stuart一向賣公主風著名, 2013年改變和日本婚紗生產商Kuraudia的合作, 正式開設專門店出售自家的婚嫁系列, 暫時只有在日本丸之內店限定發售, 好奇驅使到網站看看葫蘆賣什麼藥, 一看之下.......竟然走的是淘寶公主風! 正宗無眼睇(I don't want to see)

淘寶感十足的公主風婚紗

實拍! 爆款立體玫瑰花婚紗

OMG! 繼續非常淘寶風! 親, 包郵成嗎?

這款不就是上幾篇寫過的<亂世佳人>風嗎!?!?!?!

當中比較「正常」的款式:

全都是上身不俗, 但下襬較蓬, 修身點就perfect~

反而這兩款Empire waist高腰線的婚紗有點Jane Austen感, 意外不錯耶~

最後附送官網: http://www.jillstuart-wedding.com/

心目中的婚禮 (寫於13年6月)

距離上次紀錄過了4個月, 又是時候紀錄一下心目中婚禮是如何, 看看有沒有變化

原來: 不拍婚紗相, 後改為帶婚紗旅遊自拍
13年6月: 不變, 但男友提議年底到泰國旅遊時, 再拍

原來: 大禮一切從簡, 希望用一封包羅萬有利是代替所有
13年6月:  未確定

原來: 不用穿裙掛
13年6月:  未確定

原來: 不要玩兄弟
13年6月:  看到running man有個遊戲好好玩.......可能有變......

原來: 只要兩, 三位姐妹, 沒有指定服飾, 不訂造, 助為資助置裝, 希望婚禮後大家可以繼續穿著
13年6月:  不變

原來: 唔擺酒, 最好大家"免禮", 簡單cocktail證婚 (唉....已變)
13年6月:  提議給否決, 已shortlist了幾家酒樓, 公佈後再聯繫

原來: 簡單穿一套婚紗, 時間留給親戚朋友傾計影相
13年6月:  跟有豐富姐妹經驗的伴娘談過, 擺酒的話沒人穿婚紗斟茶敬酒, 最少也要多預2套晚裝 

原來: 簡單造型, 一個髮髻幾殳花, 無幾層眼睫毛
13年6月:  不變, 已shortlist心水 mua

原來: 新郎著西裝, 毋需禮服
13年6月:  應該不變

原來: 媽媽們著得體套裝, 唔想要珠片衫
13年6月:  不變, 但男友評論: 這不是我們可決定的事, 不要有希望才不會失望.....

原來: 簽名筆, 戒指枕等等只用一次的東東可免則免, 最怕婚禮後留亦難時掉亦難
13年6月:  少少變化, 在荷蘭看到一個小盤好可愛, 買了當戒指盤, 不過看到原來可印字的黏土戒指盤賣的不貴, DIY亦容易, 有少少心動......